O portavoz do BNG en Lugo, Rubén Arroxo, anunciou que o BNG levará ás distintas institucións a situación do transporte ferroviario de Lugo, despois de que, segundo denuncia, Renfe eliminase a última conexión entre Ourense e Lugo en horario nocturno.
Así, Arroxo valorou como “un desastre” a planificación levada a cabo por Renfe dos servizos ferroviarios durante os traballos de mellora nas infraestruturas. Afirmou que un só deputado do BNG no Congreso “conseguiu que se puxesen en marcha as melloras das infraestruturas”, pero, engadiu, esas melloras “teñen que vir da man de mellores conexións e máis frecuencias, e non eliminando servizos”.
Os nacionalistas critican que Lugo continúe “con menos servizos que antes do inicio da pandemia”, cando se eliminaron servizos como o tren nocturno Lugo-Barcelona. Sobre as conexións dentro de Galicia, o Bloque lamenta que a capital lucense sexa a única cidade que non ten conexión directa con Santiago.
