InicioLugo e contornaLugoA sede do Craega e as residencias de maiores enfrontan a PP...

A sede do Craega e as residencias de maiores enfrontan a PP e PSOE

Nun bronco pleno da Deputación.

PUBLICADA O

- Advertisement -

O traslado da sede do Consello Regulador da Agricultura Ecolóxica de Galicia (Craega) de Monforte a Lugo e a situación da rede de residencias de maiores da provincia acenderon este martes o pleno da Deputación e propiciaron un intercambio de acusacións entre populares e socialistas durante a celebración dunha sesión que se viu interrompida polas protestas dun grupo de veciños en defensa da residencia de Becerreá.

O enfrontamento comezou co debate dunha proposta para a aprobación dun convenio interadministrativo de cooperación entre a Deputación Provincial de Lugo e o concello de Cervantes para a construción dun Centro de atención a persoas maiores no municipio.

Durante a súa quenda de intervención e por mor da rede de residencias de titularidade provincial, o portavoz do PP na Deputación de Lugo, Antonio Ameijide, acusou ao presidente da institución de ter residencias pechadas, “como a de Becerreá”, “por capricho político ou persoal”.

“Tardouse menos tempo en construír as residencias da Fundación Amancio Ortega que o que tardou o PSOE en conectar a corrente eléctrica en Becerreá”, manifestou o portavoz popular, antes de ser reprendido na súa réplica polo deputado socialista Pablo Rivera por tratar, ao seu xuízo, de “embarrar” o debate.

INTERRUPCIÓN DO PLENO

O momento de maior tensión viviuse pouco despois, cando un reducido grupo de persoas, membros dunha plataforma proapertura da residencia de Becerreá, irrompeu no salón de plenos con pancartas e chalecos amarelos, o que motivou a interrupción da sesión durante algúns minutos.

“Se non se quitan os chalecos terán que abandonar o pleno. Non estamos nunha obra”, interpelou o presidente, José Tomé, aos manifestantes, para acto seguido responsabilizar aos deputados provinciais do PP de instar á cidadanía a interromper os plenos “por deporte” e a “rebentar” as sesións. “Interromper os plenos é un delito”, declarou.

Desde a bancada popular afearon o xesto de Tomé expulsando aos manifestantes do salón de plenos e acusárono de “implantar un código de vestimenta”, “limitar o aforamento da sala” impedindo “o acceso á cidadanía” e de “estrañar”, co seu comportamento, “outro tipo de réximes”.

A SEDE DE CRAEGA

O segundo choque frontal entre socialistas e populares tivo lugar como consecuencia dunha moción presentada polo Grupo Provincial Socialista reclamando ao portavoz dos populares, Antonio Ameijide, desculpas públicas por “as mentiras, a manipulación e a desinformación vertida en torno ao traslado da sede do Craega” de Monforte de Lemos a Lugo.

“Tiven que tomarme un tempo de introspección este fin de semana para pensar en como responder as súas bobadas”, comezou dicindo, en velada referencia ao período de reflexión anunciado a pasada semana por Pedro Sánchez, o portavoz dos populares na Deputación de Lugo.

“Non vou pedir perdón por unha moción froito dun complexo e dunha falta de altura política. Este pleno está para debater cousas serias e importantes, non para bobadas deste calado. O ego do presidente xa se comeu á persoa”, manifestou, acto seguido, acusando ao tamén alcalde de Monforte do cambio de sede do consello.

Na súa réplica, o presidente da Deputación, que acusou ao PP de “pactar” co Craega o cambio de sede e de “tentar mover tamén outros consellos reguladores situados en Monforte”, responsabilizou a Ameijide de “iniciar todas as disputas” e “utilizar o manual da mentira”: “A vostede gústalle desprezar e ningunear aos demais. A vostede gústalle o barro porque non sabe xogar nun campo bo”.

Si que existiu consenso, con todo, entre Goberno e oposición, en relación á moción presentada polo Grupo Provincial Popular para a firma por parte da Deputación dun convenio propio para o persoal do servizo de limpeza de centros e dependencias de titularidade provincial, que foi aprobada por unanimidade co voto a favor da totalidade dos deputados provinciais.

ÚLTIMAS

Unha multitudinaria marcha clama en Palas contra a fábrica de Altri: “É un atentado á nosa maneira de vivir”

Miles de persoas marchan a esta hora polas rúas do municipio lucense de Palas de...

Adra Pallón, o fotógrafo lucense que retrata a desaparición deses “lumes ou casas habitadas”

"Unha voz que se move entre o berro, a denuncia e a homenaxe", así define...

XXI Xornadas Técnicas de Seragro: 14 e 15 de novembro

O comité organizador das XXI Xornadas Técnicas de Seragro está xa a traballar na...

Altri sobre a súa planta en Palas: “non emitirá dioxinas nin será prexudicial para a saúde”

Greenfiber, do grupo portugués Altri, defende que a planta de fibras téxtiles que proxecta...