Representantes de Greenfiber, formada pola enerxética Greenalia e a multinacional lusa Altri, reuníronse coa Asociación Provincial de Empresarios da Primeira Transformación da Madeira de Lugo (Lugomadera) para presentarlles o proxecto Gama, que pretende a construción dunha fábrica de fibras téxtiles en Palas de Rei.

No encontro, o director do proxecto, Bruno Dapena; a directora de Recursos Humanos, Olga López, e o director de Altri Forestal, Miguel Silveira, deron respostas ás consultas dos empresarios madeireiros lucenses, co foco posto na madeira como materia prima para a fabricación de fibras solubles para aplicacións téxtiles e Lyocell, unha fibra desenvolvida a partir do primeiro produto.

Segundo recolle Greenfiber nun comunicado, a idea é xerar valor xuntos, grazas a crear lazos coas comunidades locais.

En concreto, Miguel Silveira sinalou que o proceso requirirá anualmente preto de 1,2 millóns de metros cúbicos de madeira de eucalipto certificada procedente de Galicia. “Fixemos estudos e sabemos que é posible”, aclarou.

“Trátase dun proxecto que mira cara ao futuro, tendo en conta o compromiso crecente do sector téxtil con este tipo de fibras e coa reciclaxe téxtil, que se ten intención de integrar no proceso produtivo nunha fase posterior do proxecto”, reivindicou Dapena.

Pola súa banda, Nuria Rodríguez, xerente de Lugomadera, concluíu a xornada asegurando que “este proxecto é necesario para o sector forestal da provincia de Lugo, así que iremos da man nesta iniciativa”.