Piden oito anos de cárcere para un home acusado de agredir sexualmente á súa parella en Lugo en marzo de 2022. O caso xulgarase na sección 2ª da Audiencia Provincial de Lugo o vindeiro mércores, día 10, despois de que en xaneiro tivese que ser suspendido pola imposibilidade de comparecer da denunciante.
Segundo recolle o escrito de cualificación do Ministerio Fiscal, o procesado penetrou vaginalmente á súa parella cando esta estaba a durmir, afectada o alcol e “aproveitando a súa falta de consciencia”. Nese momento, ela espertou e conseguiu apartalo dun empuxón.
A Fiscalía considera que estes feitos supoñen un delito de agresión sexual, polo que piden unha pena de oito anos de cárcere e a prohibición de achegarse á muller, ao seu domicilio, lugar de traballo ou estudos, e de comunicarse con ela durante 15 anos.
Ademais, impoñen a liberdade vixiada durante sete anos e o pago das costas. En canto a responsabilidade civil, o procesado deberá indemnizar á vítima con 15.000 euros polos danos morais causados.
