O presidente da Deputación de Lugo, José Tomé, participou este martes no pleno de constitución da Comisión de Deputacións Provinciais, Cabidos e Consellos Insulares da Federación Española de Municipios e Provincias (FEMP), celebrado no Senado, en Madrid.
Unha sesión que, tras as eleccións municipais, abre un novo mandato para este órgano de representación dos gobernos locais intermedios de todo o país e de cuxa apertura se encargou o presidente do Senado, Pedro Rollán.
Tomé Roca foi elixido para formar parte da Comisión Permanente, que a conforman 18 representantes de todo o territorio español. Desde esta posición defenderá que se dote de máis fondos europeos á mobilidade no rural.
Así, destaca que as deputacións son as institucións “vertebradoras do territorio, que chegan a onde outras administracións non chegan, que igualan oportunidades e que achegan os servizos básicos”. “Son unha ferramenta que leva funcionando 200 anos e que é preciso potenciar”, afirma.
