O Grupo Municipal do PP en Lugo presentou este venres o segundo número dun boletín informativo concibido para “fortalecer a comunicación” coa cidadanía, desagregar os proxectos impulsados desde a oposición e denunciar os compromisos incumpridos por un Executivo local cualificado polos populares como “bastante ausente e sen orzamentos”.
“O obxectivo é facer un balance deste seis meses e destacar os asuntos máis importantes nos que participamos desde a constitución da corporación”, comezou dicindo, a modo de presentación, a portavoz municipal do partido, Elena Candia, acompañada pola práctica totalidade dos membros do grupo.
Candia, que destacou a presentación por parte do partido de “72 iniciativas” –entre proposicións, rogos e preguntas– nos seis plenos ordinarios celebrados ata o momento, así como o rexistro de “66 preguntas e rogos nas comisións de pleno”, aproveitou tamén a súa intervención para enumerar os proxectos incumpridos, ao seu xuízo, por parte do Executivo encabezado por Lara Méndez.
A portavoz popular puxo o foco na ausencia de parcelas para construír un “novo centro de saúde no barrio da Residencia” e para destinar a “vivenda pública”; na recepción de “moitos menos fondos europeos dos esperados”; ou na “falta de garantías” sobre a rehabilitación do cuartel de San Fernando. Proxectos, todos eles, salientou Candia, “anunciados e comprometidos pola alcaldesa”.
No outro lado da balanza situou a portavoz municipal do PP os avances logrados na cidade grazas, precisou, á intervención da Xunta de Galicia. “Terminamos o 2023 con actividade no barrio da Residencia, coa PXOM aprobado definitivamente e estudando distintas propostas para a construción dunha nova comisaría na cidade”, destacou.
