Axentes da Policía Nacional da Comisaría de Lugo detiveron a un home como presunto autor dun delito de tráfico de drogas, nun operativo no que se incautaron de máis de 4 quilos de cocaína, o maior alixo desta droga intervido na cidade.
Segundo informaron fontes policiais, as investigacións iniciáronse ao ter coñecemento da existencia de movementos sospeitosos na rúa San Roque, que podían facer pensar nalgunha posible actividade ilegal. O dispositivo de vixilancia establecido permitiu interceptar a un home cando se apeaba do seu vehículo. O sospeitoso levaba un quilo de cocaína oculto nas súas roupas, e nunha bandoleira levaba outro vulto idéntico.
Os axentes procederon á súa detención e, ao inspeccionar o coche, atoparon unha ‘caleta’, un agocho oculto no vehículo, no que foron localizados outros dous paquetes de droga. En total, os paquetes pesaron 4,700 quilos de cocaína. O detido foi posto a disposición do xulgado, que decretou o seu ingreso en prisión provisional.
