A alcaldesa de Lugo, Lara Méndez, celebrou o asentamento en Lugo dunha das oficinas do Ineco, a principal enxeñaría do país dependente do Ministerio de Transportes, Mobilidade e Axenda Urbana.
Lara Méndez visitou este luns as instalacións da consultora pertencente ao Ministerio de Transportes, Mobilidade e Axenda Urbana acompañada do seu presidente, o tamén lucense Sergio Vázquez Torrón. Conforme informou o Concello de Lugo, a empresa de enxeñaría conta con 15 empregados traballando na recentemente estreada oficina, primeiro centro remoto que abre no país.
A compañía integrada por máis de 5.500 profesionais, desenvolve proxectos punteiros técnica e tecnoloxicamente no ámbito da mobilidade sustentable e a transformación dixital, tanto a nivel nacional como internacional, tendo presenza, actualmente no cinco continentes.
“É para nós un orgullo como lucenses comprobar que a cidade ofrece un ecosistema atractivo que resulta un reclamo para que as entidades privadas –como vemos sucede a través do fondo de capital Lugo Transforma– pero tamén as públicas escollan o noso municipio para desenvolver a súa actividade e decidan establecerse aquí para iniciar ou avanzar no seu proceso de descentralización”, destacou.
Méndez comprobou da man do presidente de Ineco que o equipo instalado en Lugo responde a un perfil diverso e multidisciplinar, con titulacións diferentes que van desde a enxeñaría civil, de camiños, aeronáutica, agrícola, pasando por arquitectura e informática.
“Procedentes de distintos puntos de España, este grupo de profesionais traballa actualmente en proxectos para Adif, Enaire e Ministerio de Transportes, Mobilidade e Axenda Urbana e poderán, en futuro, achegar a súa experiencia para outros proxectos nacionais e internacionais que a empresa desenvolve“, avanzou Sergio Vázquez.
A alcaldesa aplaudiu tamén a vontade de Ineco de impulsar alianzas con universidades e centros de Formación Profesional, así como de abrir posibles vías de colaboración con empresas locais no territorio, en alusión ao convenio de colaboración asinado esta mesma xornada coa Universidade de Santiago de Compostela (UC) para avanzar no deseño de infraestruturas lineais de ferrocarril e estradas.
Deste xeito, investigadores do Campus de Lugo de Enxeñaría Civil e do Departamento de Matemáticas, que son punteiros na área, traballarán conxuntamente no desenvolvemento dunha aplicación pioneira a nivel mundial con gran potencial.
