A Policía Nacional detivo o fin de semana a un home tras ser interceptado cun paquete de cocaína, de 160 gramos de peso, oculto na roupa na estación de autobuses de Lugo.

Segundo informa o Corpo Nacional, ocorreu durante uns controis habilitados nas terminais da cidade. Nun destes dispositivos, os axentes observaron como unha persoa, ante a presenza policial, trataba de saír do seu campo de visión.

Deste xeito, un dos actuantes seguiuno e interceptouno na parte exterior da estación co obxecto de identificalo. Alí, “cunha actitude moi nerviosa”, tratou de eludir “canto antes” a acción do policía, que procedeu ao seu cacheo superficial sobre as súas pertenzas e persoa.

Así, o axente localizou oculto baixo a roupa un paquete cunha sustancia, supostamente cocaína, que posteriormente arroxaba un peso de 160 gramos. Tras estes feitos, procedeuse á súa detención e traslado a dependencias policiais, onde se tramitou o correspondente atestado antes de ser posto a disposición xudicial.