Axentes da Policía Local de Lugo interceptaron a un condutor, que foi denunciado como presunto autor dun delito contra a seguridade viaria ao dobrar a velocidade máxima permitida nunha das rúas da cidade.
Os feitos ocorreron na Estrada Vella de Santiago, onde se interceptou a un condutor que circulaba a 116 km/h nunha zona limitada a 50 km/h. O condutor foi identificado e instruíronse dilixencias para un xuízo rápido.
Por outra banda, foi interceptado outro vehículo na Rolda da Muralla cuxo condutor circulaba sen ter o permiso en vigor, por perda total dos puntos asignados. Instruíuse denuncia por un suposto delito contra a seguridade viaria e inmobilizouse o coche.
A Policía Local informou tamén de varias denuncias por circular baixo os efectos do alcol. Unha delas tramitouse contra un condutor que circulaba pola Rolda de Fontiñas e que deu resultado positivo de 0,43 mg/l no test de alcoholemia; e na rúa Paula Fabio Máximo foi sorprendido un condutor circulando cunha positiva de 0,31 mg/l.
