A líder provincial dos populares lucenses e candidata do PP na cidade para as eleccións do 28 de maio, Elena Candia, revelou os nomes craves do seu equipo de urbanismo, entre os que situou a Miguel Couto, quen foi concelleiro desta área coa socialista Lara Méndez no Concello ata que dimitiu en marzo de 2021.
Cando deu o paso, Couto alegou motivos persoais, aínda que no ámbito local transcenderan varios conflitos e dificultades na xestión da súa área. En rolda de prensa este luns, Candia avanzou que se gaña o 28M e logra o goberno da cidade, encomendará a Couto –cuxo papel se cinguirá a dar apoio técnico pero non irá na candidatura– ser o xerente de Evislusa, empresa municipal para desenvolvemento de chan e vivenda.
Pero ademais de Couto, a popular anunciou que tamén integrará no seu equipo de urbanismo aos arquitectos Ramón Cabarcos e Manuel Cortón. Ambos si que irán na súa candidatura.
“QUE NINGUÉN VEXA NIN VINGANZA, NIN TRAIZÓN, NIN REVANCHISMO”
“Que ninguén vexa neste paso nin vinganza, nin traizón, nin revanchismo”, manifestou, pola súa banda, Couto, quen asegurou que se presenta por “Lugo”, e que ve en Evislusa “unha oportunidade de enriquecemento persoal e profesional”, porque se trata dunha “gran ferramenta” que agora considera “infrautilizada”.
Couto apelou á necesidade de xestionar “con axilidade” e de dar “resposta a situacións hai que xestionar con axilidade, dar resposta a situacións anómalas en varias urbanizacións na cidade”. Pola súa banda, a candidata popular destacou “o valente paso á fronte” que dá o exedil para “retomar uns traballos que non foi capaz de desenvolver no mandato que está a piques de acabar”. Nesa liña, subliñou que “a súa contribución desde un perfil técnico e a experiencia que acumula serán decisivas para poder mirar xa cara a un novo modelo de planificación urbanística”.
“UNHA ADMINISTRACIÓN COLABORADORA E ÁXIL”
Acompañada das súas ‘fichaxes’, Candia situou a “parálise” no ámbito urbanístico entre os principais problemas aos que se enfronta a cidade, e reivindicou unha administración “colaboradora e áxil” que facilite pasos adiante no ámbito do investimento.
Tamén reivindicou a experiencia e o perfil de Cabarcos e Cortón. Do primeiro, dixo que “é unha das persoas que ten unha visión máis global sobre as oportunidades que presenta esta contorna”, á vez que subliñou a súa “decidida contribución” no campo cultural á fronte da Escola Superior de Arte e Deseño Ramón Falcón.
Con respecto a Manuel Cortón, manifestou que “a súa experiencia como arquitecto municipal en Lugo, durante 16 anos en dúas diferentes etapas, é unha garantía do dominio e da experiencia á hora de resolver cuestións técnicas do día a día dos veciños”.
