A portavoz nacional do Bloque Nacionalista Galego (BNG), Ana Pontón, puxo en valor este xoves a peonalización de Lugo como un “sinal de identidade dun goberno do BNG” porque “mellora a calidade de vida das persoas”.
Así o sinalou nunha visita á cidade onde coñeceu os traballos levados a cabo por Rubén Arroxo, actual integrante do goberno municipal e candidato á Alcaldía do Bloque.
Para ela, Arroxo e o seu equipo están transformado Lugo “en positivo” e facendo que a cidade “mellore, avance e aumente as súas oportunidades económicas e dinamismo, pondo sempre ás persoas no centro para gañar calidade de vida”.
“Quitarlle o poder aos coches para darlle o poder ás persoas é un sinal de identidade do goberno municipal do BNG”, subliñou Ana Pontón, quen destacou outras iniciativas como a posta en valor de todo a contorna da muralla.
“Hoxe Lugo é unha cidade con máis calidade de vida grazas ás actuacións do BNG desde o goberno baixo a batuta de Rubén Arroxo, candidato á Alcaldía”, reivindicou Pontón, mostrando a súa confianza en que el será o líder do próximo goberno municipal.
Pola súa banda, Arroxo subliñou que no últimos catro anos a cidade gañou 15 rúas peonalizadas, o que axuda ao incremento das vendas dos comercios. “O BNG de Lugo cumpriu cun 95% do seu programa nas áreas que xestionou”, engadiu.
