Case dez anos despois volveu este xoves á Audiencia Provincial de Lugo José Carnero, alias ‘O Chucán’, neste caso para ser xulgado por un delito de asasinato en grao de tentativa a un compañeiro da residencia onde se atopaba en Remar, no municipio de Baralla.
Carnero, que se limitou a responder as preguntas formuladas pola súa avogada, Paloma Becerra, afirmou que mantiña unha “inimizade” coa vítima e, mesmo, deslizou que lle tiña “teima”.
Con todo, polos feitos que lle imputan, alegou que actuou en defensa propia despois de que o agredido abalanzouse sobre el e agarrouno “polo pescozo”.
Visiblemente desmellorado, con gorro e máscara, o procesado precisou da axuda de axentes da Policía Nacional e Garda Civil para a entrada ao xulgado. Foi trasladado desde o cárcere, onde permanece desde que se produciron os feitos, o 20 de agosto de 2021.
Segundo o relato da Fiscalía, ese mesmo día sobre as 19,30 da mañá, o acusado colleu un coitelo de cociña, dirixiuse á vítima e “aproveitando a circunstancia de acharse de costas”, atacouno “de forma inopinada e sen mediar palabra”. Ministerio Público e acusación particular piden 14 anos de cárcere, mentres que a defensa interesou a libre absolución do seu patrocinado.
“TIÑA MALAS RELACIÓNS CON TODOS”
Antes da vista oral, a propia vítima asegurou que “non” esperaba a arremetida do acusado. “Son cousas que pasan”, deslizou, á vez que negou que tivesen “malas relacións”.
No entanto, a continuación, matizou que ‘O Chucán’ tiña “malas relacións con todos” na residencia. “Comía sobre a cuba de lixo e logo dicía que a comida estaba mal feita e facíao sempre”, relatou, a modo de exemplo.
Seguidamente, admitiu que “agora está ben”, aínda que ao principio foi “duro”. “Que cumpra a condena e xa está. Agora, vivir a vida, que é o que queda”, soltou.
O avogado da vítima, Manuel Bermúdez, confirmou que solicita o mesmo que Fiscalía: unha pena de 14 anos de prisión por un asasinato en grao de tentatida.
Sobre a residencia, Remar, puntualizou que é un centro que acolle a exconvictos e traballan aí, en moitos casos facendo mudanzas. “É a primeira vez que se dá un caso, non adoita haber problemas”, sinalou, á vez que celebraba que o suceso non fóra a máis “porque o coitelo non era moi grande e porque o sitio onde lle deu non lle afectou moito”.
ABSOLUCIÓN OU DELITO DE LESIÓNS
A defensa do acusado adiantou que ía solicitar “a libre absolución e subsidiariamente a cualificación dun delito de lesións, coas atenuantes de arrebato e problema psiquiátrico e sicótico que padece José (Carnero)”.
‘O Chucán’ volveu a xuízo logo que en 2013 fose condenado a dez anos de prisión por un delito de asasinato dunha muller na súa casa, unha pena que quedou extinguida en 2019.
Nese caso tívose que enfrontar a dous xuízos. Nun primeiro momento, foi absolto por un xurado popular, pero a vista tívose que repetir logo que confesase, días despois ante un xornalista de ‘La Voz de Galicia’, que fora o autor do crime.
