A Policía Local de Lugo asistiu a unha muller que estaba en compañía da súa filla, menor de idade, despois de que supostamente fose agredida pola súa parella, pero a vítima renunciou a ser avaliada por un médico e, polo menos nun principio, non mostrou vontade de denunciar ao seu agresor.

Segundo a Policía lucense, os feitos ocorreron na mañá do pasado domingo na zona de interior de Murallas. Nai e filla foron trasladadas a un centro sanitario onde, cando estaba a piques de ser atendida, a muller renunciou a este dereito e abandonou o ambulatorio “un tanto alterada”, segundo o relato policial.

Por conseguinte, ambas foron trasladadas “cun vehículo camuflado” de novo ao seu piso, onde o suposto agresor tamén deixara varios danos no interior do domicilio conxugal. O suposto agresor abandonara o domicilio antes da súa chegada, “non levando as chaves do piso, só as dun vehículo”.

A Policía Local relata que segundo o testemuño da pequena, esta non sería a primeira vez que suceden situacións similares, aínda que a ela “nunca lle gritou nin lle pegou”. A muller non mostrou intención de presentar denuncia polo momento e explicou que ela e a súa parella atópanse en trámites de separación.