A asociación Lugo Monumental reclama á Universidade de Santiago de Compostela que reabra de “inmediato” o vicerreitorado no centro da cidade, no edificio que alberga a exposición permanente da Domus Mitreo, fronte á catedral e fronte á muralla de Lugo na Praza Pio XII.
O presidente de Lugo Monumental, Luís Latorre, acusou ao Vicerreitorado do Campus de Lugo de “facer o contrario do que anunciou hai vinte anos cando instalaron ese edificio e onde se falaba da integración da universidade coa cidade”. “Agora reverte iso e deixaron un edificio medio baleiro no centro histórico”.
Non acaba de entender que se xustifique o peche destas oficinas, que se trasladaron ao propio campus, “con que se van facer actividades culturais”, dado que, argumentou, o edificio “vai estar pechado”.
“Con que criterio lle dicimos á xente que hai que respectar o centro histórico e o patrimonio histórico, cando a administración máis cultural de todas deixa aos pés dos cabalos unha zona histórica, tendo un edificio que está fronte á muralla, Patrimonio da Humanidade, e da catedral, que tamén é Patrimonio da Humanidade?”, afeou.
Latorre advertiu que este peche prexudica ao centro da cidade, porque “aí é necesaria a actividade constante e non que poñan edificios moi bonitos pechados baixo sete chaves”.
O peche do edificio na Praza Pío XII levou tamén á candidata do PP á alcaldía de Lugo, Elena Candia, a expresar o seu rexeitamento a esta decisión. Para Candia isto supón “descapitalizar” o centro histórico, cando “este espazo ten que ser o motor económico da cidade”.