Os transportistas de Tradime, en Lugo, rexeitaron a posibilidade de incorporar peaxes ás vías de alta capacidade e advertiron de que, se finalmente se cobra polo uso, isto restaría “competitividade a Galicia”.
Unhas declaracións que se producen logo que a ministra de Transporte, Raquel Sánchez, reiterase, esta semana, a súa postura de que hai que exporse un sistema de mantemento das estradas e, singularmente, das vías de alta capacidade como son as autovías.
O vicepresidente de Tradime, José Fernández, puxo de relevo que no sector “sempre” se opuxeron “a este tipo de novo imposto, e se se nos aplica como sector afectaríanos moi negativamente”. “Se o tivésemos que aceptar, o que fariamos sería trasladalo (os seus custos) como ocorre co gasoil aos cargadores”, advertiu.
Fernández deixou caer que “isto sería engadir un custo máis aos produtos que transportamos e isto orixinaría en Galicia que se reste competitividade”. “Non é unha boa noticia. Buscan fórmulas para recadar e xa están a dar por feito que a xente vai asumir a súa implantación”, dixo.
O empresario do transporte puxo o acento en que, ademais, en Lugo “apenas” se dispón delas, pondo o exemplo da A-6, “que nin sequera” conta cun “proxecto de reconstrución cuns prazos determinados ou fixo”. “Parécennos peaxes (se se implantase) por algo que non podemos utilizar”, protesta.
José Fernández tamén se referiu á A-8, que son as dúas autovías que atravesan a provincia de Lugo, polos problemas no alto do Fiouco. “Vai ter que ocorrer outro accidente para que se implante un sistema” para cruzar sen problemas por ese lugar, lamentou.
Finalmente, volveu insistir en que “a peaxe para Galicia e para Lugo non é positivo, sobre todo, tendo en conta o custo do que se fala, de dez céntimos para turismos por quilómetro de autovía e vinte céntimos para os camións”.
Unha nova polémica para o sector, o posible pago polo uso de autovías, que se suma ás críticas ao desvío de Pedrafita, pola caída da ponte na A-6, que en caso de neve obrigaríaselles aos camións a que usen a Nacional 120 para esquivar Pedrafita do Cebreiro.
