Preto de 33.000 familias que residen en zonas illadas e dispersas da provincia de Lugo terán acceso a Internet de alta velocidade. Segundo informou a empresa de telecomunicacións Adamo, trátase de veciñanza que agora conta cun sinal de baixo rendemento ou que, directamente, carece de conexión.

Así o comunicou o Ministerio de Asuntos Económicos e Transformación Dixital a semana pasada, ao facer público o resultado provisional da segunda convocatoria do Programa Único-Banda Ancha, financiado polo fondo Next Generation EU e dentro do Plan de Recuperación, Transformación e Resiliencia.

O Goberno investirá 12,3 millóns de euros nesta acción para a que tamén se atraerán 5,2 millóns de capital privado ata alcanzar os 17,5 de orzamento total. O prazo para a instalación comezará unha vez que a resolución sexa firme e finalizará o 31 de decembro de 2024.