O Tribunal Superior de Xustiza de Galicia (TSXG), con sede na Coruña, analizará o 30 de setembro o recurso que presentou Ana Sandamil contra a condena a prisión permanente revisable que lle impuxo a Audiencia Provincial de Lugo polo asasinato da súa filla de sete anos, Desirée Leal, ocorrido en Muimenta o 3 de maio de 2019.

O pai da nena, José Manuel Leal, confirmou que se “sinalou para o día 30 de setembro, que coincide co último día do mes”. Confía que se manteña a condena de prisión permanente revisable, á vez que confesou que é “duro” volver enfrontarse ao “recurso, porque xa é bastante duro convivir sen Desirée no día a día”.

“Estando as cousas como están e que non haxa unha condena firme é volver revivir esa monstruosidade. Un ten a Desirée todos os días no recordo, co sentimento de dor, angustia e perda dunha filla”, expresou.

Polo demais, sobre a denuncia por ameazas que lle presentou a actual parella de Sandamil, José Manuel Leal puntualizou que el xa conta “coas testemuñas” para un xuízo que se pode celebrar “entre decembro e xaneiro deste ano”. Unhas ameazas que volveu a negar e que confía que a “xustiza” se impoña ante tal denuncia.

A nai de Desirée atópase encarcerada en Teixeiro, e para a toma de declaración do 30 de setembro José Manuel Leal ten claro que finalmente non se desprazará e a fará por “videoconferencia”.