Todas as zonas da provicia de Lugo superaron o 80% de ocupación hoteleira durante o mes de agosto, no que áreas como A Mariña e a Ribeira Sacra chegaron a alcanzar o 95% durante a ponte do día 15.

Así se extrae dos datos facilitados este martes pola Asociación Provincial de Empresarios de Hostalaría e Turismo de Lugo (Apehl), que reflicten unha mellora das cifras de ocupación respecto de xullo.

As cifras da hostalaría luguesa apuntan a que todas as zonas da provincia pasaron o 80% de ocupación en agosto, especialmente durante a primeira quincena. Así, na Mariña alcanzouse o 85,20%, en Ribeira Sacra o 88,5%, na zona centro o 87% e en Lugo cidade o 81,70%.

O perfil do turista que elixiu Lugo para as súas vacacións é de procedencia española, fundamentalmente chegado de Madrid, aínda que tamén destacan os castelán leoneses, os cataláns e os andaluces. Entre o visitante foráneos, predominan os franceses.

De cara ao próximo mes de setembro, as previsións apuntan a unha caída de entre o 45 e o 60%, especialmente nas áreas máis turísticas como A Mariña e Ribeira Sacra.