Axentes da Policía Local de Lugo tramitaron denuncia por unha talla de árbores que incumpría os requisitos da ordenanza municipal e que non fora comunicada de forma adecuada.
Segundo informaron fontes municipais, os feitos ocorreron na mañá do pasado venres, cando un indicativo da Policía de Barrio foi comisionado para acudir á parroquia de Bascuas, onde se podería estar a levar a cabo unha talla ilegal.
Unha vez no lugar, os axentes comprobaron que había operarios facendo estes labores e que os traballos se iniciaron sen cumprir os requisitos contemplados na ordenanza municipal. Así, a solicitude de autorización presentouse tras a intervención policial, e non se fixo efectivo o importe da fianza.
Os policías tamén comprobaron que non se adoptaron as precaucións necesarias e que a provisión de madeira estaba a realizarse sobre terreo de titularidade pública. Así mesmo, o carril de circulación estaba invadido por restos da talla, así como a beiravía, practicamente inutilizado.
ACCIDENTE CON FUGA
Por outra banda, a Policía Local de Lugo informou da tramitación de denuncia contra un condutor que se viu involucrado nun accidente de tráfico sen feridos e que abandonou o lugar.
O sinistro rexistrouse sobre as 14,25 horas do domingo, cando un vehículo que se internaba na rúa Serra de Outes, procedente de Lamas de Prado, chocou contra outro turismo estacionado e ausentouse da zona.
Grazas á información facilitada por unha testemuña e á colaboración da Policía Nacional, os axentes lograron localizar o coche implicado no accidente, nunha senda peonil próxima ao Miño, na zona de Saamasas.
A Policía contactou co titular do turismo e iniciou os trámites para identificar á persoa que conducía o vehículo no momento de accidente, co fin de realizar as oportunas dilixencias de denuncia.
