Unir o Centro de Empresas e Innovación (CEI Nodus) co tecido social, asociativo, educativo e económico de Lugo. Tal é o propósito da xornada de portas abertas que organiza o Concello este venres 27 no complexo de Garabolos, que incluirá un percorrido guiado de 10.15 a 10.45 horas. A iniciativa vai dirixida á cidadanía no seu conxunto, con aceno nas entidades vencelladas ao emprendemento.
O nodo empresarial botou a andar no 2004, e dende entón prestou asesoramento a 3.000 proxectos, formando e difundindo o labor de 5.000 persoas emprendedoras. No CEI Nodus agromaron 400 empresas, que empregan a medio milleiro de persoas. Dende o Concello agardan que a xornada de portas abertas sirva de pulo para a zona, onde recentemente foi inaugurada a escola infantil construída pola Fundación Amancio Ortega.
LugoXornal é un dos máis recentes produtos do CEI Nodus, na actualidade no cen por cen de ocupación nos 27 espazos para empresas, entre o viveiro, o sementeiro, os obradoiros e laboratorios e a Aula Coworking. Por iso, xunto coa colaboración no Demoday do Inicia Coworking, será parte activa da xornada de portas abertas do Centro, que asemade xestiona a iniciativa paralela a pé de rúa no barrio da Tinería.
Por último, dende o Concello explican que a xornada de portas abertas debe servir como exercicio de transparencia, amosando o destino dos orzamentos da corporación. As políticas de emprego adican tres millóns de euros neste 2018. Os proxectos en funcionamento benefician a 250 persoas, entre os programas Empregalia, Inicia Coworking, os viveiros de empresas do CEI Nodus, os obradoiros de emprego e o plan Mellora Lugo.
