A Xunta puxo en marcha o hospital de día de saúde mental infanto-xuvenil da área sanitaria de Lugo, A Mariña e Monforte de Lemos, que atenderá a pacientes con idades comprendidas entre os 12 e os 18 anos con patoloxías como trastornos da alimentación, trastornos mentais graves, trastornos do espectro autista e trastornos de conduta, entre outros.
Segundo detallou a Consellería de Sanidade nun comunicado, trátase do cuarto dos sete hospitais de día de saúde mental infanto-xuvenís previstos no Plan de Saúde Mental de Galicia, aprobado a mediados de 2020, tras os de Vigo, Santiago e Ourense. O novo hospital de día de saúde mental infanto-xuvenil de Lugo está situado na planta 1 do Hospital Universitario Lucus Augusti, xunto ahospitalización de Pediatría. Está atendido por un equipo multidisciplinar de profesionais de psiquiatría, psicoloxía, enfermaría, traballo social e terapia ocupacional, e conta ademais con outro persoal de apoio.
Ademais, a Xunta indicou que traballará de forma “conxunta, coordinada e interdisciplinar” con outros servizos implicados na atención destes pacientes, como poden ser pediatría ou endocrinoloxía. Nesta mesma liña, Sanidade explicou que está concibido para realizar tratamentos ambulatorios activos e busca non separar aos nenos e adolescentes do seu ámbito normal de vida cotiá.
O obxectivo do plan, indicou a Consellería, é que haxa un hospital destas características en cada unha do sete áreas sanitarias galegas no ano 2024.
UNIDADE DE PREVENCIÓN DO SUICIDIO
Por outra banda, a Consellería de Sanidade destacou que o Plan Saúde Mental 2020-2024, tamén creou na área sanitaria de Lugo, A Mariña e Monforte de Lemos unha unidade de prevención do suicidio e, desta maneira, “cumpre o compromiso do Sergas de que, a finais de ano, cada unha do sete áreas sanitarias galegas conten cunha unidade deste tipo”.
Ademais, tamén en área lucense, ao amparo deste plan, a Xunta puxo en valor a creación de programas de psicoloxía de ligazón entre atención primaria e hospitalaria e “o reforzo do persoal do programa sociosanitario que atende a saúde mental de persoas usuarias de residencias”.
