Un home acusado de violar e pegar á súa muller en Lugo, polo que se lle pide 19 anos de prisión, negou os feitos no xuízo que comezou na sección segunda da Audiencia Provincial de Lugo.

En principio o xuízo estaba sinalado para o pasado 10 de marzo, pero non se puido celebrar ao non comparecer o acusado, que segundo a súa avogada atoparía traballo “fóra” por aquel entón. Xa nese momento a súa letrada asegurou que os feitos non eran “certos” e confirmou que pedía a absolución para o seu cliente.

No seu escrito, a Fiscalía detalla que a vítima chegara a España desde Marrocos na primavera de 2019, despois dun matrimonio concertado pola súa familia e que en maio dese ano se trasladou ao domicilio do presunto agresor.

Segundo o relato do Ministerio Público, o home someteu á muller a “continuos insultos e vexacións”, non a deixaba saír de casa, controláballe o móbil e non lle daba diñeiro para comprar comida ou roupa. Tamén sostén que o procesado pegou á vítima e a agrediu sexualmente, prolongándose esta situación durante un mes onde tamén lle quitou as chaves do piso para que non puidese saír.

Fiscalía solicita unha condena de dous anos e seis meses de prisión por un delito de malos tratos habituais; outros seis anos e seis meses por detención ilegal e dez anos polo delito de agresión sexual.

A avogada da vítima explicou que van “máis ou menos na mesma liña do Ministerio Fiscal, simplemente máis amplo en canto a malos tratos habituais”. Sobre o estado da muller, puntualizou que “está mal, tras a situación que pasou”. Ademais, confirmou que pedirá unha indemnización.