Comisións Obreiras (CC.OO.) lamentou este martes o falecemento de Julio Agrelo Trigo, un dos referentes históricos do sindicato na provincia lucense e membro tamén da primeira corporación democrática do Concello de Lugo.
Agrelo Trigo, que faleceu aos 87 anos de idade, foi recoñecido en 1993 co Premio 10 de Marzo de CC.OO. pola súa traxectoria e hai dous anos foi homenaxeado pola súa achega ao sindicado e á loita obreira.
Neste sentido, o presidente da Fundación 10 de Marzo e ex secretario xeral de CC.OO. en Galicia, Xan María Castro, destacou o labor de Agrelo na constitución de CC.OO. “Julio asistía, aínda que na clandestinidade, ás reunións da coordinadora dos CC.OO. de Galicia”, subliñou Castro, indicado que foi un dos fundadores do sindicato e unha das persoas “clave” na súa expansión e consolidación na provincia de Lugo.
Na mesma liña falou o tamén ex secretario xeral de CC.OO. Xosé Manuel Sánchez Aguión, pondo en valor o papel de Agrelo como sindicalista “ao pé do conflito” e “moi recoñecido e valorado” polos seus compañeiros.
