A Deputación de Lugo realizará melloras na estrada provincial LU-0-3505, que conecta a localidade de Navia de Suarna coa parroquia de Donís, no concello de Cervantes, cun investimento de preto de 137.000 euros.
Segundo sinalou a institución, o proxecto inclúe a renovación de practicamente o conxunto da vía, xa que se actuará en 26 quilómetros dos 28 totais.
Os traballos consistirán no acondicionamento e a repavimentación da vía e actuarase no treito comprendido entre os quilómetros 0,970 e o 26,654. O prazo de execución é de 3 meses.
Así mesmo, o presidente da Deputación, José Tomé destacou a importancia desta actuación e recalcou que a mellora das comunicacións é “unha prioridade” para o goberno provincia.
Ademais, puxo en valor a defensa da mobilidade como “un dereito básico dos veciños da provincia” porque asegurou que “unha boa rede de estradas é fundamental para o equilibro territorial e para o desenvolvemento do rural”, xa que “axuda a fixar poboación e a achegar os servizos”.
