O PP de Lugo mostrouse “moi preocupado polo feito de que a Deputación iniciase as obras do Parque Central de Galicia antes contar coa licenza municipal”. Unhas acusacións ao paso das cales saíu o ente provincial para tachalas de “falsidades” e pedir aos populares que “deixen de manipular e de mentir”.

“Moi preocupados deixounos o presidente da Deputación de Lugo, o socialista José Tomé, coa súa resposta á pregunta do PP (no pleno) de se o centro do Parque Central de Galicia ten toda a documentación completa, porque o propio presidente aseverou que non ten licenza, que están a esperar a licenza do Concello”, sostén, nun comunicado, o portavoz popular na Deputación, Javier Castiñeira.

Destaca que o PP “está a favor deste proxecto”, pero “quere saber se todo está a facerse en regra, e por iso pediu toda a documentación e non se lle deu completa”. “As desculpas do presidente non nos valen”, agrega. En resposta, a Deputación de Lugo emitiu un comunicado no que esixe ao PP que “retire de inmediato as falsidades que verteu sobre as obras do Parque Central de Galicia” e que “deixe de enganar os veciños” e de “obstaculizar”.

Respecto diso, o ente provincial remarca que conta con permiso da Consellería de Medio Rural para os traballos iniciados de acondicionamento e labores nas parcelas adquiridas pola Deputación, que incluíron rozas, corta de eucaliptos e plantación de especies autóctonas. Tamén apunta que as obras da estrada provincial LU-P-0301 “non necesitan autorización” por que é de titularidade da Deputación.

E no tocante ás obras do Parque Central, di que para poder inicialas “é necesario que o Concello de Antas de Ulla aprobe o plan especial de infraestruturas e dotacións, que xa lle presentou a Deputación á entidade local o pasado 11 de marzo, e, unha vez aprobado, que conceda a correspondente licenza municipal”. “Por tanto, o comezo destas obras depende única e exclusivamente da axilidade coa que o Concello de Antas de Ulla conceda á Deputación as autorizacións necesarias“, deixa claro.

OUTRAS ACTUACIÓNS

Noutra orde de cousas, a Deputación informou de que inicia as obras de mellora da vía provincial que vai de Sarria ao Páramo, cun investimento de 75.700 euros. Por outra banda, a Deputación abre este venres, 1 de abril, o prazo de presentación de candidaturas aos terceiros premios á hostalaría e ao turismo.