A Deputación de Lugo deu o pistoletazo de saída a unha nova vía para a promoción dos recursos turísticos da provincia a través da edición de tres documentais temáticos, centrados no turismo científico, a gastronomía e o Camiño de Santiago.

A deputada de Réxime Interior, Promoción do Territorio e Turismo, Pilar García Porto, explicou que a institución provincial decidiu impulsar a produción destes traballos audiovisuais, cunha duración aproximada de 50 minutos cada un, para “seguir contribuíndo a potenciar o sector turístico na provincia e dinamizar a súa actividade” desde un punto de vista sustentable e de calidade.

Para arrincar a súa difusión, García Porto avanzou que os novos documentais serán enviados a todos os institutos públicos da provincia e tamén aos sete centros de atención a maiores cos que conta a deputación. “Máis aló de futuras accións de difusión, parécenos unha boa fórmula poñer a disposición dos centros educativos e das residencias este material para seguir dando a coñecer a inmensa e variada riqueza patrimonial coa que contamos na nosa provincia”, explicou García Porto.

O primeiro dos documentais, ‘A gastronomía na provincia de Lugo’, centra o seu foco nos produtos e na xente que os traballa, coa presenza de profesionais como a Asociación de Cociñeiros de Lugo. En ‘Rutas científicas pola provincia de Lugo’, pola súa banda, percórrense as diferentes rutas científicas que existen no territorio, como a Serra do Xistral, o Xeoparque Montañas do Courel ou as xeorrutas pola costa cantábrica. Finalmente, o último documental dá a coñecer as rutas xacobeas a través dos propios peregrinos e dos lucenses.