A Deputación de Lugo aprobou este martes, de forma unánime, unha declaración institucional na que condena a “agresión” de Rusia a Ucraína. A institución provincial sumarase á convocatoria da Federación Española de Municipios e Provincias de cinco minutos de silencio este mércores ás 12,00 horas fronte ao Pazo de San Marcos en Lugo.
O presidente da Deputación de Lugo, José Tomé Roca, foi o encargado de convocar este martes á Xunta de Vogais para acordar entre o tres grupos políticos representados na corporación provincial dita declaración. A reunión saldouse co acordo unánime de PSdeG, BNG e PPdeG para rexeitar a invasión de Ucraína por parte das tropas rusas. Ademais de expresar a “total solidariedade” da Deputación co pobo ucraíno, reclamouse un “alto ao lume inmediato” e a volta á vía diplomática como “única fórmula para resolver as diferenzas” e alcanzar acordos de paz.
Nun comunicado, a institución provincial ratificou a “plena dispoñibilidade” da institución provincial de axudar a paliar a crise humanitaria a través das “canles establecidas polo Goberno de España”. A declaración recolle o apoio da Deputación ao pobo ucraíno, así como a súa postura sobre que este conflito supón “unha volta a tempos escuros que Europa debería desterrar para sempre”, á vez que asegura que “non hai nada que xustifique as vítimas mortais e o cruel sufrimento dos sobreviventes”.
