Os comerciantes de Lugo mostraron a súa satisfacción pola autorización do concello lugués á instalación de barracas polas festas do San Froilán, que se celebran na Cidade dAs Murallas entre 4 e o 12 de outubro.
Tras coñecerse que a alcaldesa, Lara Méndez, asumiu a responsabilidade da instalación destes postos despois da ‘non’ da área de Cultura do goberno local en mans do BNG, o presidente da Federación Galega de Comercio, José María Seijas, valorou o paso do concello despois de días de incerteza.
“É necesario que haxa un atractivo, que haxa unha forza que atraia á xente porque esa sinerxía para o comercio é boa para as vendas”, reivindicou, antes de apelar a que “non poden perderse as tradicións” sempre baixo o respecto ás medidas de seguridade vinculadas á crise sanitaria.
“O San Froilán é unha reseña de Lugo e hai que seguir manténdoa, tratando de que a xente veña á cidade”, subliñou Seijas, que se preguntou que sen casetas (non as haberá este ano) e sen barracas “non quedaría absolutamente nada” das festas patronais de Lugo.
“Os concertos están ben, pero os concertos non é algo tradicional nas festas de San Froilán. Cada vez imos perdendo máis desas tradicións que temos e chegará un momento, que niso si que en Lugo somos especialistas, que destruiremos todo o que temos bo e cada vez será peor”, aseverou José María Seijas.
