O conselleiro de Cultura, Educación e Universidade, Román Rodríguez, adiantou este sábado que a Xunta licitará nas primeiras semanas de xuño, por un total de 650.000 euros, as obras para garantir a conservación do claustro da Catedral de Lugo, que presenta danos polo paso do tempo e por factores ambientais.
Este anuncio realizouno o titular de Cultura durante unha visita realizada á basílica, onde explicou que esta actuación está enmarcada no plan de catedrais no que traballa o Goberno galego para poñer a punto estes templos entre 2021 e 2027. Esta folla de ruta, dixo Rodríguez, é unha “útil ferramenta que marca a folla de ruta dos próximos anos no ámbito patrimonial e que servirá para que as nosas catedrais afronten a ‘década xacobea’ nas mellores condicións de conservación”.
A primeira intervención en Lugo ao amparo do plan de catedrais da Xunta estará centrada en resolver as patoloxías que afectan o claustro dun templo que definiu como “unha das xoias do Camiño Primitivo”. “Trátase dunha actuación que estamos a piques de licitar e que contará cun prazo de execución de seis meses, polo que estará lista no ano 2022”, concretou o conselleiro. De feito, o inicio do proceso administrativo coincidirá coa celebración do 90 aniversario da declaración desta basílica como Monumento Histórico-Artístico Nacional, que se conmemorará o vindeiro xoves, día 3.
Para dar inicio a estes traballos, xa se realizaron unha serie de sondaxes arqueolóxicas na zona co fin de avaliar o seu sistema construtivo e a súa potencialidade. Esta obra, segundo informa a Xunta, permitiu sacar á luz restos arqueolóxicos de diferentes épocas históricas que van desde o Imperio Romano ata actualidade, así como documentar varios muros e unha necrópole.
Co arranque da restauración na basílica lucense, a Xunta traballa xa en cinco templos catedralicios –todos eles vinculados ao Camiño de Santiago– co horizonte do Xacobeo 2027. Neste contexto, o conselleiro de Cultura incidiu en que estas actuacións “requiren que todas as administracións implicadas traballen xuntas, de maneira planificada, coordinada e sumando vontades e esforzos”.
