A Fundación Amigos de Galicia repartiu este xoves a cea de fin de ano a 52 familias de Lugo en situación de risco ou exclusión social con menores ao seu cargo que a entidade atende de forma habitual na cidade.
Coren Gril proporciona parte do menú –34 rotis de polo– que, elaborado con produtos típicos, está composto por un entrante, un prato principal e guarnición, e unha sobremesa –unha caixa de Pedras de Santiago da empresa Sancosa S.L.–. Ademais do menú, o persoal da entidade tamén entregou conservas de peixe, mantas e máscaras, de Anova Mask.
A este respecto, a Fundación Amigos de Galicia sinalou nun comunicado que comprobaron que moitas das persoas ás que atenden, “acoden coas máscaras en malas condicións por non ter recursos para custealas“.
“Somos conscientes do difíciles que son estas datas para as familias que se atopan en situación de vulnerabilidade, moitas das cales non dispoñen dos recursos para poder preparar a cea de Fin de Ano nas súas casas. Por este motivo, co obxectivo de que todas as familias poidan vivir estas festas con dignidade, puxemos en marcha esta iniciativa”, explicou a entidade.
O programa tamén se levou a cabo en Ourense, e en Noiteboa nas cidades de Santiago de Compostela, Pontevedra e Vigo. Ademais, a fundación indicou que se estiveron realizando reparticións especiais de alimentos con produtos do Nadal, entregados a través dos supermercados, a familias en risco de exclusión social de toda Galicia; así como a entrega de máis de 2.500 agasallos aos menores das familias usuarias a través da campaña ‘Comparte un xoguete, comparte ilusión’.
