EFE |  O Ministerio de Transportes, Mobilidade e Axenda Urbana investirá 108,5 millóns de euros en dous contratos para modernizar a liña do ferrocarril entre Lugo e Monforte de Lemos.

A subdelegada do Goberno, Isabel Rodríguez, sinalou en declaracións aos medios que está previsto que “esta mañá” o Consello de Ministros autorice a licitación de dous contratos por parte do Ministerio de Transportes que “son fundamentais para a conexión de Lugo coa alta velocidade” a través de Ourense.

Trátase, precisou a subdelegada, “da execución de dous proxectos decisivos, como son a renovación da vía entre Lugo e Monforte de Lemos e a construción do novo túnel de Oural-Sarria”.  Estas dúas actuacións “suman un investimento de 108,5 millóns de euros” e supoñen “unha boa noticia” para a provincia, a ollos de Rodríguez.