A suposta xuíza pitonisa de Lugo, suspendida cautelarmente

- Advertisement -

A xuíza investigada por exercer supostamente de pitonisa en Lugo será suspendida de xeito cautelar por un máximo de seis meses. O promotor da acción disciplinaria do Consello Xeral do Poder Xudicial (CGPJ) tomou esta decisión, segundo informa GaliciaConfidencial, logo de comprobar indiciariamente que a titular do Xulgado de Vixiancia Penitenciaria número 3 de Lugo cobrou por botar o tarot e seguiu con esta actividade logo de que trascendera publicamente.

Esta acción chega logo de que en xuño o CGPJ abrira expediente disciplinario á xuíza, pola comisión dunha falta moi grave por, supostamente, anunciarse coma tarotista e vidente e levar a cabo estas prácticas. A decisión da suspensión provisional, tal e como informou este xoves o Consello Xeral, ampárase no previsto no artigo 417.6 da Lei Orgánica do Poder Xudicial, de actividades incompatibles co cargo de xuíz ou maxistrado, que quedan establecidas no artigo 389 da mesma norma.

Deste xeito, o promotor da acción disciplinaria considera que as actuacións reflictidas no expediente permiten acreditar indiciariamente a actividade da xuíza. “Vén exercendo unha actividade de cartomancia a través da baralla do tarot, aceptando diñeiro a cambio”, asegura. Este negocio continuou incluso despois de que tanto o Tribunal Superior de Xustiza de Galicia coma o propio CGPJ abriran dilixencias informativas, logo de trascender a actividade.

Así as cousas, a suspensión cautelar queda xustificada “en vista da gravidade dos feitos”, “a posibilidade de reiteración de conduta” e “da natureza da sanción que se lle podería impor en caso de apreciarse comisión de falta”, que podería chegar á expulsión da carreira xudicial.

Antes da suspensión, a comisión disciplinaria do Consello dará audiencia á xuíza expedientada, como tamén ao Ministerio Fiscal, para que realicen as alegacións oportunas.

Redacción

+ posts

Redacción

ÚLTIMAS

O PPdeG acusa o Goberno central de atrasar infraestruturas viarias na provincia de Lugo

A Audiencia de Lugo xulga un home acusado de agredir sexualmente unha muller que non podía prestar consentimento

O San Froilán programa 346 actividades e pechará cun espectáculo de 500 drones e a Orquestra Panorama

O PP denuncia que o Goberno “non ten data” para abrir a nova estación intermodal de Lugo