A Deputación de Lugo quixo sumarse ás reivindicacións do colectivo LGTBI+ e mostrar o seu “firme compromiso” a través dunha declaración institucional con motivo do Día Nacional do Orgullo, que se celebra este domingo 28 de xuño, na que aposta por “traballar desde a escola” para lograr a igualdade.
Así, o goberno provincial dirixido por José Tomé reafirma o seu apoio ás políticas “que contribúan a alcanzar unha sociedade que garanta os dereitos e a igualdade real” das persoas LGTBI+, especialmente as mulleres lesbianas, trans e bisexuais, as “grandes invisibilizadas“, ás que este ano se lle dedica a lema ‘Mulleres LTB: sororidade e feminismo’.
Por iso, a Deputación apela a facer “un esforzo específico” para recoñecer a loita e as necesidades destas mulleres que sofren unha “dobre discriminación” no contexto dunha “sociedade machista”.
“Temos que traballar desde a escola, porque só coa educación en diversidade alcanzaremos unha igualdade plena, consolidada e real. E precisamos traballar nas institucións, públicas e privadas, para facer real esa igualdade, rexeitando os estereotipos negativos que tantas veces acompañan ás mulleres lesbianas, bisexuais ou trans”, remarca o goberno provincial.
OS DEREITOS LGTBI NO RURAL
Ademais, a Deputación alude ao marcado “carácter rural” de Lugo, o que engade en ocasións “dificultades específicas aos problemas” que teñen que afrontar as persoas LGTBI+: “Soidade, falta de referentes, maior incomprensión social e familiar, mesmo rexeitamento“.
Por iso, a institución fai un chamamento a que os concellos sexan a administración “máis próxima” ao colectivo que vive en pequenos municipios, posto que responsables políticos e persoal municipal debe “reforzar o seu compromiso” cos dereitos destas persoas.
O ARCO DA VELLA NO CEMITERIO MUNICIPAL DE LUGO
Por outra banda, na capital provincial, este símbolo aparecerá ao longo da próxima semana nas portas do cemiterio municipal para homenaxear “todas as persoas que en vida tiveron que ocultar a súa orientación sexual”, tal e como explicou a edila de Participación e Servizos para os Veciños de Lugo, Cristina López.
“Trátase dunha homenaxe a todas as persoas LGBT que descansan no noso cemiterio, pero tamén é unha chamada ao conxunto da sociedade para avanzar na eliminación de todo tipo de discriminacións e violencia, especialmente contra a diversidade afectivo sexual”, engadiu, aínda que apostou por traballar nesta materia “todos os días do ano”.
