A área sanitaria de Lugo arrinca este domingo coa primeira baixada no número de casos activos na provincia: 555 positivos, tres menos ca os confirmados na xornada do sábado. De todas maneiras, e aínda que a tendencia é favorable, estas cifras deben ser entendidas nun contexto de fin de semana, que podería retrasar as notificacións dos casos. Ademais, nesta actualización do rexistro xa non se contabilizan as dúas persoas que morreron nas últimas horas no HULA: un varón de 92 anos e unha muller de 86.

Segundo datos do Sergas, deses 557 doentes, 14 permanecen na UCI (+1 dende onte): dez na Unidade de Coidados Intensivos do Hospital Lucus Augusti (HULA) e os outros catro no Hospital Público da Mariña. Así mesmo, 84 persoas están hospitalizadas (-3 respecto de onte) e 459 nos seus domicilios (-1).

Ademais, a área sanitaria deu 39 altas, catro máis ca as que se deran ata este sábado. O número de pacientes falecidos elévase a 14, tras sumar dous pacientes finados no HULA.