A Plataforma Galicia Baleira, na que está integrada a Federación de Asociacións Veciñais de Lugo, solicita á Xunta un plan de descentralización administrativa e de servizos co obxectivo de fomentar a fixación de poboación en todo o territorio. Neste sentido, reclaman que Lugo acolla a sede da Consellería de Medio Rural.

“Anteriormente todo estaba centralizado en Madrid. Agora ocorre en Santiago”, aseguran. Piden que Galicia “distribúa” a Administración, os poderes políticos e o funcionariado “como base para frear a despoboación rural e a súa integración nunha sociedade avanzada con calidade de servizos e prestacións”.

Botan man dalgúns exemplos de servizos descentralizados para apoiar a súa petición. Así, lembran que a Academia Galega de Seguridade está situada en A Estrada (Pontevedra) e as Delegacións de Pesca teñen a súa sede en Vigo e na Mariña. Así, “con todo dereito”, Lugo “debería de ser a sede autonómica da Consellería de Medio Rural e instamos a todos os partidos políticos a posicionarse” sobre esta proposta, din.

EN OURENSE

Xa que na Plataforma tamén está integrada a Federación de Asociacións Veciñais de Ourense, a reclamación tamén inclúe a suxestión de que esta provincia acolla o Instituto de Termalismo de Galicia, amais da sede da Consellería de Medio Ambiente, Vivenda e Ordenación do Territorio.