Unha das tres xogadoras profesionais de voleibol que perseguiron e conseguiron reter a un atracador até a chegada das patrullas do Corpo Nacional de Policía (CNP) recoñeceu que a elas nin sequera se lles “pasou pola cabeza o medo” ou que o individuo puidese facerlles “algo”.

Todo sucedeu moi rápido, cando as tres xogadoras do EMEVÉ saían dun adestramento e viron correndo por unha rúa do centro histórico de Lugo un home “con carapucha e unha braga que lle cubría a cara” e detrás del a outro que gritaba “ao ladrón, ao ladrón”.

Nun primeiro momento, as tres mozas pensaron que se trataba dunha “broma”, pero ao decatarse de que non era así, botáronse a correr detrás do suposto atracador, que tentara roubar nun local de hostalaría da zona monumental só uns minutos antes.

Foi Inma Lavado a que logrou collelo á carreira, pero o suposto atracador “non se comportou de forma violenta” con ela. Simplemente, “empezou a andar” e dixo que “el non fixera nada” e que quería marcharse, pero ela “tíñao parado”.

As tres mozas e un cliente do local de hostalaría que supostamente tentara atracar, rodeárono e retivérono ata que chegaron “cinco coches da Policía Nacional”, tres vehículos patrulla e outros dous camuflados. “Nin se nos pasou pola cabeza o medo, nin que nos puidese facer nada”, asegurou.