O deputado de Promoción Económica da Deputación de Lugo, Pablo Rivera, anunciou, tras a xunta de goberno provincial, a aprobación dun “novo plan de contratación” para o ano 2020. Prevese que axude a “axilizar” os tempos, de maneira que esta anualidade estiman levar adiante uns douscentos contratos de obras, servizos e subministros por 20 millóns de euros.
Rivera aclarou que isto permitirá “máis transparencia e certo aperturismo da institución”, ademais da redución dos tempos de contratación, xa que naqueles contratos de regulación harmonizada rebáixanse a quince días. “Imos ser máis áxiles na contratación, moito máis eficaces e moito máis efectivos”, destacou. “É unha oportunidade para mellorar o funcionamento da Deputación, xa que se traballa con previsión de futuro e coa racionalización de medios e tempos”.
Nese plan aparecen recollidas todas as actuacións de cada unha das áreas, “desde as de menor entidade ata as de maior entidade, como pode ser o da xestión das residencias ou de construción das propias residencias e tamén no referido a emulsión asfáltica”, engadiu o deputado de Promoción Económica.
PARQUE MÓBIL
De feito, na xunta de goberno deste venres tamén se aprobou a licitación do contrato de subministro de emulsión asfáltica para o Parque Móbil. Será un contrato cunha duración dun ano, prorrogable por outro máis. A contratación ascende a preto de 1 millón de euros.
