O reloxo da Catedral de Lugo é a imaxe do cupón do Once do próximo mércores 29 de xaneiro, que se enmarca na serie ‘Cidades en punto e hora’, dedicada aos 52 reloxos máis emblemáticos das cidades españolas.

Con iso, máis de cinco millóns e medio de cupóns difunden xa a imaxe do Reloxo da Catedral lucense. O actual, segundo os estudos realizados polo historiador Adolfo de Abel Vilela, é o quinto dos albergados na torre da fachada norte da catedral, desde que a finais do século XVI se colocase o primeiro reloxo mecánico que houbo na cidade para servizo público e que estivo en funcionamento 180 anos.

Refire Abel Vilela que a historia dos reloxos da torre da Catedral de Lugo compendian, en certo xeito, “a historia da reloxaría de Galicia”, debido ao número e importancia dos reloxeiros que fixeron as maquinarias e daqueloutros que as mantiveron ao longo dos séculos. A Torre que alberga o reloxo edificouse na segunda metade do século XVI, igual cás campás litúrxicas.