O secretario xeral de Unións Agrarias (UU.AA.), Roberto García, estimou este luns que a superficie afectada pola praga de ratas toupa na montaña de Lugo supera “entre un vinte e un trinta por cento” os cálculos da Xunta de Galicia. Acusan a administración de non ter actuado a tempo e coidan que iso contribuíu a que unha problemática “localizada” se transformara nunha problemática “xeral” de toda a comarca.
O Goberno galego apuntara que se viran prexudicadas máis de 3.000 leiras nun total de 1.630 hectáreas de oito concellos. A respecto diso, Roberto García afirmou que “iso é o mínimo contrastado, pero probablemente haxa un vinte ou un trinta por cento máis de superficie afectada”, avaliou.
Subliñou que “hai gandeiros que, dado que teñen seguro, non van recibir ningún tipo de compensación por estes danos”. “Vendo a actitude de pasotismo que práctica a administración (a Xunta), xa nin perden o tempo en ir declarar a superficie afectada”, abundou.
DUN PROBLEMA LOCAL A UN PROBLEMA XERAL
Roberto García lamentou que o que isto pon de manifesto “é que o que empezou sendo un problema nunha parroquia (en Triacastela) está a converterse nun tema que afecta a moitos gandeiros pola falta de actuación da Xunta durante este nove meses”. “Hai unha responsabilidade real e patrimonial da Xunta que, ante a ausencia de medidas, está a converter un problema que estaba localizado nun problema xeral de toda a comarca (da montaña de Lugo)”, concluíu.
