A Policía Local detivo en Lugo a un home como presunto autor dun delito de violencia de xénero tras acudir a un domicilio da cidade no que unha parella mantiña unha discusión.
Diso informou a Policía Local, que explicou que os feitos ocorreron sobre as 14,00 horas do martes, cando se requiriu a presenza dos axentes ante a “forte discusión” que mantiña a parella.
Unha vez no punto, segundo o relato policial, a muller, “moi nerviosa e alterada”, manifestou que o que fora a súa parella a ameazou con “botala da vivenda” e “cortarlle a luz e a auga”. Ademais, denunciou que o detido a ameazara de morte.
Por todo iso, ambos foron trasladados a dependencias policiais, nas que os axentes instruíron dilixencias para o xulgado de garda.
VEHÍCULOS ABANDONADOS
Por outra banda, a Policía Local de Lugo informou de que tramitou un total de 28 actas pola presenza doutros tantos vehículos abandonados nas vías públicas do centro urbano.
En concreto, precisou que se trata de 25 turismos e tres furgonetas. As actas foron remitidas ao órgano competente da Administración local para autorizar a retirada dos vehículos.
