O grupo municipal do Partido Popular informou que axentes da Policía Local de Lugo, acompañados por membros da xunta de persoal do Concello, interromperon un ensaio da banda de música para identificar á “persoa que estaba a exercer como director”, por supostas “irregularidades” na súa “situación laboral”.
Segundo informou a concelleira Beatriz Vázquez, edís do Partido Popular estaban a realizar unha das visitas programadas a diferentes servizos municipais cando se atoparon con este “esperpento”. “O que nos atopamos onte cando fomos ao ensaio da banda foi un esperpento. Os músicos que estaban tiveron que parar porque o seu director plantounos”, dixo a edila, porque “ao parecer hai irregularidades” na súa situación laboral, “o que motivou que se presentase a xunta de persoal coa policía para levantar acta”.
Ao seu xuízo, “parece que cada vez imos a peor”, porque “o novo goberno local quería contratar a alguén para que a banda tocase no San Froilán e resulta que unha xestión tan común e simple non se fixo correctamente”. Por iso, preguntábase “que repercusións legais e económicas podería” ter que asumir o Concello por “ter unha persoa traballando en dependencias municipais sen ningún tipo de contrato, como dan a entender que ocorre”.
“Que responsabilidades penais poderían ter os membros do goberno por esa orde?“, insistiu. Desde o seu punto de vista, “é unha pena que durante décadas deixouse morrer unha banda con tanta fama como a de Lugo, que leva xa tres anos sen dirección e cos músicos en precario”.
