Os deputados de Lugo no Congreso Jaime de Olano e Joaquín García esixiron ao Goberno central que “precise” como “vai afectar á provincia” o pago en autovías “que planea o Executivo de Pedro Sánchez”.

Nun comunicado de prensa, os populares lucenses, que expresaron a súa “profunda preocupación”, tamén demandaron ao Goberno que aclare quen serán os colectivos afectados por esta taxa, así como o importe total a abonar por un usuario medio en cada unha das vías.

“É moi alarmante que non se explique cal é a proposta, a cantidade ou os percorridos afectados”, sentencian os deputados. Desta forma ambos consideran que é “necesario” concretar se esa taxa afectará negativamente “a colectivos tan importantes como o transporte ou a industria”.

No caso de aplicarse esta medida, apuntan os populares, na provincia de Lugo veríanse afectadas as autovías “A-8 e A-6”, que en total suman “215 quilómetros de percorrido”, conclúen.