A Cova Eirós, o xacemento do Paleolítico e Neolítico situado en Triacastela, podería ter a finais de ano un Centro de Interpretación. Así o cre a rexedora local, a popular Olga Iglesias, que apunta ao suposto interese que demostra a Xunta de cara a este enclave.
“Para a Xunta son primordiais estes xacementos”, asegurou Iglesias, en relación ao financiamento que achega a Consellería de Cultura dende hai catro anos. Con todo, as escavacións comezaran tempo antes (no 2008), polo que xa se están a cumprir once anos de traballo. “Esperamos poder empezar este ano co Centro de Interpretación, porque xa temos aprobada a axuda“, avanzou a rexedora.
Ademais, Iglesias puntualizou que a nova sondaxe, que se realiza en colaboración coa Universidade de Santiago, vai permitir “coñecer o que foi o Paleolítico e o Neolítico en Galicia, porque hai que lembrar que esta época é moi pouco coñecida en Galicia”, ao haber poucos xacementos de calcaria.
FINAL DE MES
Por iso, agarda que sigan asomando “restos líticos, tallas, ósos de animais” que proporcionen máis coñecemento sobre esta etapa. Do mesmo xeito, tamén deixou a porta aberta a novos achados de enterramentos e á procura de pinturas rupestres. Así pois, a alcaldesa de Triacastela espera que a finais de mes se poida concretar máis sobre as descubertas no marco das escavacións que se realizan nos últimos catro anos “grazas ás subvencións da Consellería de Cultura”, remarcou.
