O portavoz en funcións do goberno local de Lugo, Miguel Fernández, confirmou que xa están de novo en funcionamento o tres radares instalados no centro urbano da cidade de Lugo, despois do proceso de homologación ao que foron sometidos para que as súas medicións teñan validez á hora de tramitar as sancións correspondentes por excesos de velocidade.

Na cidade de Lugo hai dous radares fixos situados na Rolda da Muralla, a vía perimetral que rodea ao monumento romano e que agora é Zona 30, e hai outro que se sitúa de forma alternativa na Avenida de Madrid ou na Avenida Duquesa de Lugo.

Todos eles estiveron parados desde febreiro para ser sometidos á correspondente revisión técnica, o que motivou as críticas dos grupos da oposición municipal, que acusaron o goberno da socialista Lara Méndez de falta de previsión.

O goberno local, que non quixo entrar en polémicas con outros partidos, explicou no seu día que non podía facilitar datos sobre o funcionamento dos radares, porque se trata de información reservada cuxa divulgación pode comprometer a seguridade viaria. Nesta ocasión, Fernández limitouse a confirmar que os radares “pasaron os controis” previstos e están xa “funcionando desde hai uns días”.