O cemiterio de San Frolián, destacado en varias revistas especializadas como un dos cemiterios máis fermosos de España, celebrará o Ano Europeo do Patrimonio Cultural cunha obra teatral.
A Concellería de Concello e Cidadanía de Lugo programou para este martes, 5 de xuño, unha actuación baixo o título Quen ocupa esa cadeira no cemiterio, a cargo da compañía luguesa Palimoco Teatro. A obra terá lugar ás 21:00 horas e a asitencia é libre.
Esta xornada de teatro enmárcase dentro da programación cultural diversa que organiza a entidade local ao longo do ano para promover o coñecemento e difusión do cemiterio de San Froilán.
Coa representación teatral tamén se celebra a Semana para descubrir os cemiterios, que promove a Asociación Europea de Cemiterios Significativos (ASCE), da que forma parte o camposanto lucense, xunto con outros 178 cemiterios de 22 países, con motivo do Ano Europeo do Patrimonio Cultural. É pois unha cita orientada a achegar estes espazos á cidadanía e dar a coñecer o seu patrimonio cultural, artístico e histórico.
