A frota das provincias de Pontevedra e A Coruña permanece amarrada de forma xeneralizada nesta mañá de xoves debido á alerta laranxa que afecta á costa galega. Pola súa banda, na provincia de Lugo as embarcacións saíron a faenar, xa que este fenómeno meteorolóxico non chegará ata a tarde ao litoral lucense.

O patrón maior de Portonovo (Pontevedra), Juan José Bicada, explicou que non puido saír “ninguén do cerco nin de artes menores, nin sequera dentro da ría”, polo que se atopan en terra realizando labores de mantemento. Sinala que o “repentino” vento impide navegar con seguridade.

Por parte da confraría de Portosín, en Porto do Son (A Coruña) que tampouco se puido saír a traballar ao mar cun “forte vento” nun “mal” día. En cambio, na confraría de Burela (Lugo) infórmase que se pode faenar con normalidade esta mañá de xoves.

Esta alerta laranxa trouxo consigo ondas de oeste a noroeste de cinco a seis metros. Tras comezar pola mañá nas provincias da Coruña e Pontevedra estenderase a última hora da tarde ao litoral de Lugo.

De tal forma, recoméndase evitar os diques e zonas de costa para previr eventuais golpes de mar, ademais de evitar as actividades pesqueiras e de marisqueo nas zonas máis perigosas.