Os veciños do barrio lucense das Gándaras volven manifestarse este domingo contra os okupas. A marcha sae desde a igrexa ás 13,15 horas para dirixirse ata a única vivenda que se atopa okupada.
O presidente da Asociación de Veciños Gatos Roxos, Jaime Gueimunde, concretou o itinerario, con saída desde a igrexa e que fará “o mesmo percorrido ata a casa que segue ocupada, na rúa Virxe da Soedade”. “E despois baixaremos pola Calzada das Gándaras ata a igrexa outra vez”, sentenciou.
“Imos seguir solicitando que se cambie a lei, por unha banda, e para que esa xente marche desa casa ocupada, que leva así oito anos”, reivindicou.
Gueimunde asegurou que ante este fenómeno os veciños “están a adoptar medidas extremas, porque a pesar de que se foron (só queda okupada unha casa de oito) a xente segue tendo medo e a xente está atemorizada porque volva ocorrer e repetirse”. “No barrio, se preguntas, todos din que estes volven”, abundou.
O presidente da asociación de veciños apuntou que “vai volver ocorrer (as ocupacións ilegais) porque é unha zona que se presta a iso e a xente ten medo”. “Hai casos como o dunha familia que acabou tapiando a casa, selando ambas as portas para que non entren”, concluíu.
