A Deputación de Lugo vén de iniciar este venres os traballos de rehabilitación dun tramo da LU-P-2902, a vía que conecta Lugo con Ponte de Ombreiro. As obras, que está a realizar a empresa Explotaciones Gallegas, SL, afectan a un treito de algo máis de dous quilómetros e medio, desde o inicio da vía ata a estación potabilizadora de augas, situada no punto quilométrico 2,580.
Unha vez rematados os traballos de reapertura de cunetas, realizarase a pavimentación con aglomerado en quente e a sinalización horizontal mediante o pintado da vía con marcas reflexivas brancas. Estímase que as obras se prolonguen ao longo dos próximos quince días, aínda que a súa duración poderá variar en función das condicións meteorolóxicas.
A institución provincial destina a esta actuación 210.992€, un proxecto que é de especial importancia porque se trata dunha vía que rexistra un elevado volume de tráfico, tanto rodado como peonil. Estes traballos mellorarán a conexión entra a zona das Saamasas e a parroquia de Ombreiro e ademais, esta estrada provincial dá acceso a varias rutas de sendeirismo ao seu paso pola contorna do Río Miño.
Con estas actuacións, que se enmarcan dentro do compromiso da Deputación de Lugo de mellorar a rede viaria provincial, incrementaranse as condicións de circulación e seguridade nestes tramo, moi empregado polos veciños de Lugo e visitantes.
