A xunta de goberno da Deputación de Lugo aprobou un investimento de 230.000 euros en Pol para completar as instalacións deportivas de Mosteiro. Así o informou este venres a portavoz socialista, Pilar García Porto, que lembrou que con esta nova achega a institución provincial xa investiu preto dun millón de euros para dotar a este municipio dunha área de lecer e deportiva cun campo de fútbol de herba natural e unha área de xogos.
“Un importante compromiso que adquirimos para que este espazo convértase nun eixo dinamizador social e económico da localidade que favoreza o asentamento de poboación no rural”, explicou García Porto.
Por outra banda, tamén aprobaron o último paso administrativo para o pago de 14 subvencións dentro do programa da Deputación para a dotación e mellora de servizos comunitarios. En total, son máis de 80.500 euros para diferentes entidades de 11 concellos da provincia.
